Author: adpu

30.12.2022-ci il tarixində ADPU-nun Cəlilabad filialının əməkdaşları Cəlilabad Rayon Veteranlar Təşkilatının təşkil etdiyi 31 Dekabr – Dünya Azərbaycanlılarının Həmrəylik Günü və Yeni il tədbirində iştirak etmişlər.
İlk olaraq vətənimizin azadlığı uğrunda gedən döyüşlərdə canlarını fəda edən Şəhidlərimiz anılaraq Onların müqəddəs ruhuna fatihə oxunub.
Tədbiri Rayon Veteranlar Təşkilatının sədri, Azərbaycan Yazıçılar və Jurnalistlər Birliyinin üzvü, “Sözün işığı” qəzetinin baş redaktoru Ədalət Salman geniş nitqi ilə açıb. Qəhrəman xalqımızın tarix boyu azadlıq mübarizələrindən, keçmişindən bugünümüzə şan və şərəf dolu anlarından bəhs edərək sözlərinə davam edən Ə.Salman Möhtərəm Prezidentimiz, Müzəffər Ali Baş Komandan Cənab İlham Əliyevin rəhbərliyi ilə 44 Günlük Vətən Müharibəsində qazanılan Şanlı Zəfərdən danışaraq xalqımızla birlik və bərabərlik nümayiş etdirmişdir.
Cəlilabad rayon Qazilər birliyinin rəhbəri Maşallah Əliyev ölkəmizin bütövlüyü, parlaq gələcəyi, vətəndaşlarımızın namus və qeyrətinin hər zaman qorunmasının vacibliyini dilə gətirərək bildirmişdir ki, Azərbaycan Ordusunun yüksək döyüş qabiliyyəti, xalqımızın Ali Baş Komandanının ətrafında sıx birləşməsi işğal olunmuş torpaqlarımızın azad edilməsində əsas olmuşdur. Beləliklə, Dövlət-Xalq-Ordu birliyimizlə bütövləşən “Dəmir yumruq” düşmənin başına endirilərək onu təslim olmağa məcbur edilmişdir.
ADPU-nun Cəlilabad filialının tərbiyə işləri üzrə təşkilatçısı, “Dil-ədəbiyyat və pedaqoji elmlər onların tədrisi texnologiyası” kafedrasının baş müəllimi Aydın İbişov çıxış edərək bildirmişdir ki, 31 Dekabr Dünya Azərbaycanlılarının Həmrəylik Gününün qeyd olunması Ümummilli Liderimiz Heydər Əliyevin bütün soydaşlarımıza ünvanladığı əbədi bir dəyərdir. Bizlər bu ulu dəyərin işığında Azərbaycanımızın parlaq gələcəyi üçün daimi olaraq çalışmalı, Dövlət-Xalq birliyimizi hər zaman nümayiş etdirməli, gerçək çalışmalarımızla isə onu taclandırmalıyıq.
ADPU-nun Cəlilabad filialının “Təbiət və Sosial elmlər, onların tədrisi texnologiyası” kafedrasının baş müəllimi Ələsgər Mirzəzadə dünya Azərbaycanlılarının bir arada toplanmasını, bu tarixi gün üçün əzmkar zəhmətlərə qatlaşaraq müstəsna xidmətlər göstərmiş Ulu Öndər Heydər Əliyevin fəaliyyətini Azərbaycan tarixinin ən parlaq səhifələrindən biri adlandıraraq, hal-hazırda da bu uğurlu addımların başda Möhtərəm Prezidentimiz Cənab İlham Əliyev olmaqla davam etdirildiyini söyləyib.
Sonra, Azərbaycan Yazıçılar Birliyinin üzvü, veteran müəllim Əfrahim Abbas çıxış edərək qəhrəmanlar ölkəsi olan Azərbaycanımızın daha yüksək inkişafı üçün soydaşlarımızla bir araya gəlməyin önəmini vurğulayaraq tədbir iştirakçılarına fikirlərini poetik ifadələrlə çatdırıb. Artıq məğlub deyil, qalib xalq olduğumuzun qürurunu yaşamağın hər birimizin haqqı olduğunu bildirərək milli-mənəvi dəyərlərimizin qorunmasının vacibliyi istiqamətinə diqqətləri yönəldib.
Qarabağ Müharibəsi Veteranı, yazıçı Qurban Əhməd iftixar hissilə poetik fikirlərini səsləndirərək ümumxalq birliyimizi, bütöv Azərbaycanımızla döyünən ürəklərin hər zaman var olmasını diləyib. Respublikamızın hər guşəsində aparılan quruculuq və abadlıq işlərinin işğaldan azad olunan torpaqlarımızda xüsusi önəm daşıdığını vurğulayaraq 31 Dekabr Dünya Azərbaycanlılarının Həmrəylik günü və qarşıdan gələn Yeni il bayramı münasibətilə bütün soydaşlarımıza təbriklərini ünvanlayıb.
Çoxsaylı iştirakçıların; qazilərin, veteranların, elm və poeziya ziyalılarının parlaq nitq söylədikləri tədbir Azərbaycanımızın bütövlüyü naminə xoş istək və arzularla yekunlaşıb.

ADPU-nun Cəlilabad filialında Dünya Azərbaycanlılarının Həmrəylik Günü və Yeni İl münasibətilə Bayram tədbiri keçirilmişdir. Filialın professor-müəllim heyətinin, struktur bölmə əməkdaşlarının və müxtəlif ixtisaslar üzrə tələbələrin qatıldığı tədbirdə ADPU-nun Cəlilabad filialının tərbiyə işləri üzrə təşkilatçısı, “Dil-ədəbiyyat və pedaqoji elmlər onların tədrisi texnologiyası” kafedrasının baş müəllimi Aydın İbişov geniş nitqlə Bayram təbriki söyləyib. Bildirmişdir ki, yola salmaqda olduğumuz 2022-ci il doğma vətənimiz Azərbaycanın daha geniş inkişafını, tərəqqisini, bütün sahələrdə olduğu kimi təhsil sahəsində də uğurlarla xatırlayacağımız il olmuşdur. Xüsusilə, işğaldan azad olunan Qarabağımızın ölkəmiz üçün əhəmiyyətindən danışan natiq mədəniyyət paytaxtımızın yerləşdiyi bu füsunkar təbiətə malik tarixi yurdumuzda artıq “Xarıbülbül” festivalının keçirildiyindən, unudulmaz şairimiz Molla Pənah Vaqifin poeziya günlərinin qeyd edilməsindən, Dünya Azərbaycanlılarının Qurultayı kimi mötəbər tədbirlərə ev sahibliyi etməsindən, dünyanın ən qabaqcıl texnologiyalarından istifadə edilməklə infrastruktur yenilənmələrindən, regionun sosial-iqtisadi tərəqqisindən söz açaraq sevinc dolu fikirlərini ifadə edib. Ümummilli Liderimiz Heydər Əliyev Məktəbinin bizlər üçün qoyduğu yol bütün xalqımızın gələcək uğurları üçün də parlaq işıq saçacaqdır. Bizlər bu şanlı, şərəfli istiqamətin qürurverici anlarını Möhtərəm Prezidentimiz Cənab İlham Əliyevin müdrik Rəhbərliyilə yaşamaqdayıq. Qoy Ulu Tanrı bu Böyük Məktəbin gələcək fəaliyyəti üçün də Azərbaycan xalqına yar və yardımçı olsun.
Son illərdə Milli Həmrəylik Günümüzün tamamilə fərqli, daha yüksək əhvali-ruhiyyə və qürurla qarşılandığını vurğulayan A.İbişov ölkəmizin beynəlxalq aləmdə də artan uğurlarının milli həmrəylimizin təntənəsi, Dövlət-Xalq birliyimizin təcəssümü olduğunu qeyd edib. Dövlətçilik tariximizdə və bütün Azərbaycanlıların yaddaşına əbədi olaraq qızıl hərflərlə həkk olunmuş Şanlı Zəfər milli birliyimizin keşiyində dayanan vətəndaşlarımızın igidliyi, cəsur fəaliyyətləri, peşəkarlığı və gərgin siyasi-diplomatik çalışmalarının sayəsində əldə edilmişdir. Elə bu amal və istəklə yetişməkdə olan gənc ziyalı təbəqənin – xüsusən tələbələrimizin gələcək fəaliyyətlərində uğurlar arzulayan Aydın müəllim onların hər birinə şərəfli tarixi keçmişimizi xalqımıza yenidən ərmağan edən Ölkə Rəhbərliyimiz ətrafında daimi olaraq sıx birləşməyin faydalarından bəhs etmişdir. ADPU-nun Cəlilabad filialı olaraq başda direktor, dosent Xudayar Sultanlı olmaqla Filialın bütün kollektivini təbrik edən natiq yeni ildə də onlara müvəffəqiyyətlər arzulayaraq pak Xalqımıza birlik və bərabərlik nümayiş etdirmişdir.
Şənlik iştirakçıların şən-əhval ruhiyyəsi və sevinc dolu anlarla davam etdirilib.
ADPU-nun Cəlilabad filialı olaraq Dünya Azərbaycanlılarının Həmrəylik Günü və Yeni il münasibətilə Azərbaycan xalqını təbrik edir, Xalqımıza daima sülh, əmin-amanlıq, can sağlığı, daha bol ruzi-bərəkət arzulayırıq!

«ON1000» proqramı çərçivəsində ADPU Cəlilabad filialında Tələbə Gənclər Təşkilatının təşkilatçılığı ilə “İnklüziv təhsildən inklüziv cəmiyyətə” adlı tədbir keçirilmişdir. Təlimçi və eyni zamanda Filialda “Keyfiyyətin təminatı” şöbəsinin müdiri olan Dürdanə Əliyevanın məzmunlu çıxışı tələbələr tərəfindən böyük maraq və rəğbətlə qarşılanıb. Xüsusən tədris prosesinin üstünlüklərindən yararlanmağın yollarını tələbələrə təmkinlə, məntiqlə və əsaslı dəlillərlə izah edən D.Əliyeva onların çoxsaylı suallarını da uğurla cavablandırmışdır.
Bundan başqa, Filialın Tələbə Gənclər Təşkilatının xüsusi dəstəyi ilə daha bir intellektual istiqamətli fəaliyyət həyata keçirilmişdir. Belə ki, bu dəfə müxtəlif ixtisaslar üzrə tələbələrin “Nə?, harada?, nə zaman?” intellektual bilik yarışmasına təşkilatçılıq edilmişdir.
İstedadlı tələbələrimizin xüsusi bacarıqlarının aşkarlanması, onların elmi biliklərin əldə olunmasına maraq və yaradıcı təfəkkürlərinin möhkəmləndirilməsi üçün önəmli fəaliyyətlər davam etdirilir.

24 dekabr 2022-ci il tarixində Cəlilabad rayon Heydər Əliyev Yaradıcılıq Mərkəzində Rayon Tələbə Gənclər Təşkilatının birgə fəaliyyətilə ADPU-nun Cəlilabad filialında “Məktəbəqədər təlim və tərbiyə” ixtisasının IV tədris ili tələbəsi Leyla Quluzadənin “Həsrət qoxulu mələklər” kitabının təqdimatı keçirilmişdir. Tədbirdə Filialın professor-müəllim heyətilə yanaşı Şəhid ailə üzvləri, Qazilər, Cəlilabad Rayon Gənclər və İdman İdarəsinin rəisi Elçin Hüseynov və müxtəlif ixtisaslar üzrə tələbələr iştirak etmişlər.
İlk olaraq Dövlət Himnimiz səsləndirilib. Vətənimizin bütövlüyü uğrunda canlarından keçən Şəhidlərimizin əziz xatirələri anılıb, Onlara xüsusi hörmət və ehtiram bildirilib.
Kitabın müəllifi, mövzusu, real həyat amalı barədə iştirakçılara geniş məlumat verən Cəlilabad Rayon Gənclər və İdman İdarəsinin rəisi E.Hüseynov yaradıcı gənclərimizə lazımı şəraitin yaradılmasının qarşıda duran vacib məsələlərdən biri olduğunu vurğulayıb. Möhtərəm Prezidentimiz Cənab İlham Əliyevin ölkəmizdə həyata keçirdiyi Gənclər siyasətindən geniş söz açan natiq xüsusən vətənpərvərlik motivlərilə əhatə olunan belə bir növbəti kitabın məhz, istedadlı gəncimiz Leyla Quluzadə tərəfindən ərsəyə gəlməsini yüksək dəyərləndirib. Ümidvar olduğunu bildirib ki, müəllifin sonrakı çalışmaları da öz bəhrəsini verərək zəhmətkeş əzmin parlaq gələcəyinə yönələcəkdir.
44 Günlük Vətən Müharibəsində qəhrəmanlıq səlnamələrinin müxtəlif istiqamətlərdən qeydə alındığı bu əsərdə müəllif tərəfindən real faktlara əsaslanaraq araşdırmalar aparılmış, igid övladlarımızın daşıdığı müqəddəs vəzifələr, düşmənə qarşı əzmkar mübarizələr işıqlandırılmış, beləliklə torpaqlarımızın işğaldan azad olunması uğrundakı mübarizədə şəhid olmuş vətən övladlarımızın şanlı döyüş yollarına nəzər yetirilərək artıq ruhumuza hopmuş “Şəhidlər ölməz, Vətən bölünməz” müqəddəs idealının xalqımız üçün daimiyaşar olacağı vurğulanmış, Şəhid ailə üzvlərilə görüşdən alınan təəssüratlar qeydə alınmışdır.
Çoxsaylı çıxışlar, arzu və istəklərlə yadda qalan tədbirin sonunda qonaqlara kitablar hədiyyə edilmiş, “Həsrət qoxulu mələklər” əsərinin müəllifi Leyla Quluzadə və bütün tədbir iştirakçıları xatirə şəkli çəkdirmişlər.

23.12.2022-ci il tarixində ADPU-nun Cəlilabad filialında Vətən Müharibəsi Qəhrəmanı Qəzənfər Mahmud oğlu Ağayevlə görüş keçirilmişdir. Görüş Cəlilabad rayon Veteranlar Təşkilatı ilə birgə əməkdaşlıq şəraitində baş tutmuşdur.
İlk olaraq Azərbaycan Respublikasının Dövlət Himni səsləndirilib. Vətənimizin bütövlüyü uğrunda canlarından keçən Şəhidlərimizin əziz xatirələri anılıb. Onlara xüsusi hörmət və ehtiram bildirilib.
Görüşdə giriş nitqilə sözə başlayan Rayon Veteranlar Təşkilatının şöbə müdiri Xeyrulla Şahbazov xalqımızın igid övladı, Vətən Müharibəsi Qəhrəmanı Qəzənfər Ağayevin təqdimatını həyata keçirdikdən sonra sözü Rayon Veteranlar Təşkilatının sədri, Azərbaycan Yazıçılar və Jurnalistlər Birliyinin üzvü, “Sözün işığı” qəzetinin baş redaktoru Ədalət Salmana verib.
Qəhrəman xalqımızın keçmişindən bugünümüzə şan, şərəf dolu anlarından bəhs edərək sözə başlayan Ədalət Salman Möhtərəm Prezidentimiz, Müzəffər Ali Baş Komandan Cənab İlham Əliyevin rəhbərliyi ilə 44 Günlük Vətən Müharibəsində qazanılan Böyük Qələbədən danışıb. Bütün döyüş əməliyyatlarını yüksək səviyyədə həyata keçirərək mənfur düşməni diz çökdürmüş və beləliklə Şanlı Zəfəri bizlərə qazandırmış, vətənimizin igid, cəsur, qəhrəman övladlarından, onların fədakarlıqlarından söz açıb. Bildirmişdir ki, məhz, bu yüksək vətən sevgisi sayəsində tarixi ədalət bərpa olunaraq ölkəmizin ərazi bütövlüyü təmin olunmuşdur.
ADPU-nun “Təbiət və Sosial elmlər, onların tədrisi texnologiyası” kafedrasının baş müəllimi Şöhrət Namazova geniş nitq söyləyərək Vətən Müharibəsində qazanılan uğurlu nəticədən məmnunluğunu qeyd edib. Ana vətənimizin müdafiəsi zamanı göstərdiyi igidliyə görə həm də bir zamanlar şagirdi olan Vətən Müharibəsi Qəhrəmanı Qəzənfər Ağayevə öz minnətdarlığını bildirərək ölkəmizin belə oğulları var olduqca xalqımızın daim qürur dolu anlar yaşayacağına sonsuz inancını bildirmişdir.
Rayon Gənclər və İdman İdarəsinin rəisi Elçin Hüseynov qeyd edib ki, Vətən müharibəsi zamanı hərbçilərimizin şücaəti, canı, qanı bahasına qazanılan bu qələbə hər bir azərbaycanlı üçün son dərəcə əziz və qiymətlidir. Biz hər birimiz vətənimizin azadlığı uğrunda canlarını fəda etmiş Şəhidlərimizin əziz ailələrinə mütəmadi olaraq baş çəkməli, qazilərimizin qayğısına qalmalı, döyüşən ordu mənsublarımızın hörmət və ehtiramlarını layiqincə dəyərləndirməliyik. Dövlət-Xalq-Ordu birliyimiz və Qəzənfər Ağayev kimi oğullarımız var olduqca “Dəmir Yumruq” daim düşmənlərimizin başı üzərində olacaqdır.
ADPU-nun “Tədbirlərin təşkili və tələbələrlə iş” şöbəsinin mütəxəssisi, “Tərəqqi” medallı Nadir Babayev Ulu Öndərimiz Heydər Əliyevin vaxtilə gənc, müstəqil dövlətimizin demokratik inkişafı yolundakı dahiyanə çalışmalarının bu gün artıq öz bəhrəsini verdiyini, Onun layiqli davamçısı, Respublikamızın Prezidenti Cənab İlham Əliyevin misilsiz xidmətlərilə isə daha da şaxələndiyini bildirib. Qəzənfər Ağayev kimi oğullarımızı yetirən Azərbaycan xalqına minnətdarlıq nümayiş etdirmişdir.
Sonra Azərbaycan Yazıçılar Birliyinin üzvü, veteran müəllim Əfrahim Abbas çıxış edərək igid Azərbaycan övladı Qəzənfər Ağayevlə görüşün önəmini vurğulayaraq tədbir iştirakçılarına çağırışlarını poetik müraciətlərlə ifadə edib. Artıq məğlub deyil, qalib xalq olduğumuzun qürurunu yaşamağın hər birimizin haqqı olduğunu bildirib. Böyük gücümüzün mayasını təşkil edən birlik və bərabərliyimizin daimi olmasının vacibliyini qeyd edib.
Qarabağ Müharibəsi Veteranı, yazıçı Qurban Əhməd böyük iftixar hissilə səsləndirdiyi coşqulu nitqində bu şərəf dolu tariximizin soydaşlarımız, qəlbi Azərbaycanımızla döyünən bütün xalqımız üçün nə qədər önəmli olduğunu nümunələrlə, poetik təfəkkür tərzilə işıqlandırıb. Əsaslı faktlar səsləndirərək Qəzənfər Ağayev kimi mərd oğullarımızın böyüməkdə olan gənc nəslimizin mədəni-mənəvi, vətənpərvərlik tərbiyəsi üçün daim nümunə olacağını vurğulayıb.
Xatırladırıq ki, Azərbaycan Ordusunun baş leytenantı olan Qəzənfər Ağayev 2020-ci il sentyabrın 27-də Silahlı qüvvələrimizin Ermənistan işğalı altında olan ərazilərimizin azad edilməsi üçün başlanan Vətən Müharibəsi zamanı Murovdağ yüksəkliyinin, Suqovuşanın və Ağdam rayonunun azadlığı uğrunda gedən şiddətli döyüşlərdə qəhrəmancasına vuruşaraq xüsusi şücaət göstərmişdir.
Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Respublikamızın Prezidenti Cənab İlham Əliyevin 09.12.2020-ci il tarixli Sərəncamına əsasən Qəzənfər Ağayevə “Vətən Müharibəsi Qəhrəmanı” adı verilmişdir.
Bundan başqa, Suqovuşan qəsəbəsinin işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti ilə seçildiyinə görə 29.12.2020-ci il tarixli Sərəncama əsasən “Suqovuşanın azad olunmasına görə”; Ağdam rayonunun işğaldan azad edilməsi uğrunda aparılan döyüş əməliyyatlarınakı cəsur döyüş tapşırıqlarının yerinə yetirilməsinə görə 24.06.2021-ci il tarixli Sərəncama əsasən “Ağdamın rayonunun işğaldan azad olunmasına görə”, Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə isə 24.06.2021-ci il tarixli Sərəncama əsasən “Kəlbəcərin azad olunmasına görə” medalları ilə təltif edilmişdir.
Qəhrəman övladımız Qəzənfər Ağayevə Vətən qarşısındakı fədakar xidmətlərinə görə minnətdarlığımızı bildiririk.

22 dekabr 2022-ci il tarixində ADPU-nun Cəlilabad filialında Təbiət və Sosial elmlər, onların tədrisi texnologiyası kafedrasının müəllimi, eyni zamanda “Tələbə və tədrisin idarə olunması” şöbəsinin mütəxəssisi olan Mürsəlli Fuadın təqdimatında elmi seminar keçirilmişdir. Seminarda Filialın direktoru, dosent Xudayar Sultanlı, Pedaqoji fakültə dekanlığının nümayəndələri, “Təbiət və Sosial elmlər, onların tədrisi texnologiyası”, həmçinin, “Dil-ədəbiyyat, pedaqoji elmlər və onların tədrisi texnologiyası” kafedralarının professor-müəllim heyəti, aidiyyatı üzrə struktur bölmələrin əməkdaşları iştirak etmişlər.
Filialın direktoru, dosent Xudayar Sultanlı giriş sözü ilə nitq söyləyərək hazırkı seminarın mövzu etibarı ilə tədris prosesimizin günümüz üçün ən aktual məsələlərdən birini əhatə etdiyini bildirib. Vurğulayıb ki, Böyük Heydər Əliyev Məktəbinin layiqli davamçısı, Respublika Prezidentimiz Cənab İlham Əliyevin tədrisin keyfiyyətinin artırılması istiqamətindəki dövlət dəstəyini hər zaman hiss edirik. Belə bir əlverişli şəraitdə biz pedaqoji heyətin qarşısında duran əsas vəzifələrdən biri də tədris prosesində yeni üsul və qaydalardan məharətlə istifadə etməmizin vacibliyidir. Direktor onu da qeyd etmişdir ki, təhsilimizə günümüz reallıqları şəraitində yeni məntiqi yanaşmalar və bu istiqamətdə beynəlxalq inteqrasiya imkanlarından peşəkarcasına yararlanmaq böyüməkdə olan gənc nəslimizin mənəvi inkişafına çox böyük təkan olacaqdır.
Ali məktəblərdə interaktiv mühazirələrdən istifadənin səmərəli yolları istiqamətində geniş təqdimatla çıxış edən “Təbiət və Sosial elmlər, onların tədrisi texnologiyası” kafedrasının müəllimi F.Mürsəlli ilk olaraq elmi seminar mövzusunun günümüzün reallıqları ilə təhlilini həyata keçirərək aktuallığını vurğulayıb. Sonra, bu haqda elmi fikirlərini, tədqiqatın əsas istiqamətlərini təqdimat əsasında seminar iştirakçılarının diqqətinə çatdıraraq bildirmişdir ki, mühazirə ali məktəbin didaktikasına uyğun böyük elmi məlumatları toplamağa, zehni fəaliyyəti aktivləşdirməyə xidmət edən müəllim-tələbə əməkdaşlığı ilə, emosional qarışılıqlı təsirlə xarakterizə olunur. Bu zaman yaranan çatışmazlıqlar aşağıdakılar ola bilər: Dinləyicinin yaddaşından məlumatların qısa müddətə itməsi, fərdi və qrup halındakı fəaliyyətin idarə olunmasındakı çətinliklər; yazı bacarığı, xüsusilə konspektləşdirmə; özü öyrənmə üçün aşağı motivasiya, təlimə fərdi yanaşmanı təmin edə bilmək bacarığının olması. Lakin, istər əvvəlki dönəmlərdə, istərsə də hazırda, qısa müddət ərzində geniş elmi məlumatlar, zəngin yeni materiallar mənimsəməyə imkan verən alternativ tapmaq çox çətindir. Hal-hazırda tələbələri maraqlandıran istənilən məlumatları əldə etmək üçün çoxlu sayda internet qaynaqlarının olmasına baxmayaraq, bu materiallar fonunda çaşıb qalma ehtimalı, düzgün olmayan, elmi əsassız qeydlərin əldə olunması riski daha böyükdür. Məhz buna görə də “şəbəkədə” müxtəlif səhv materialların yayılması daha çox problemlər yaratmaqdadır.
Elə bu əsasda pedaqoji heyətin tələbələr üçün təqdim etdikləri mühazirə materialları getdikcə daha çox müəllim və tələbələr tərəfindən səslənən ortaq düşünmə formasına çevrilməkdədir və bilik zövqünün gerçəkliklə əlaqəsini həvəsləndirmək üçün hazırlanmalıdır. Həmçinin, kitablarda, səlahiyyətli insanlarla söhbətlərdə, müşahidələrdə, düşüncə və təcrübələrdə suallar vermək və onlara cavab tapmağa təşəbbüs göstərilməlidir. Nəhayət, didaktiv çalışmalar maraqlanmağı inkişaf etdirməli, lazımi məlumatları axtarmağı və onunla işləməyi öyrətməlidir. Buna görə də İnteraktiv mühazirə tələbələrin üzərində tam nəzarəti saxlamaqla, onları tədris prosesinə cəlb etməyə imkan verən vacib bir formatdır.
İnteraktiv mühazirənin növləri: problem – situasiyalı mühazirə; vizual vasitələrdən istifadə ilə təşkil olunan mühazirə; birlikdə tədris olunan mühazirə (İkili mühazirə); əvvəlcədən səhvlərlə planlaşdırılan mühazirə; mətbuat konfransı xarakterli mühazirə; söhbət xarakterli mühazirə və ya auditoriya ilə dialoq; müzakirə xarakterli mühazirə və konkret vəziyyətlərin təhlili ilə aparılan mühazirə haqqında orijinal fikirlərini ifadə edən natiq bütün bu istiqamətlər barədə ən kiçik müddəalardan fundamental əsaslaradək olan pedaqoji yanaşmalar haqqında iştirakçıları ətraflı məlumatlandırıb.
Sonda, peşəkar müzakirələr şəraitində keçirilən Seminarın işi yüksək dəyərləndirilmiş, müəllim F.Mürsəlliyə iştirakçılar tərəfindən təşəkkür bildirilərək əsaslı tədqiqatları üçün alqışlar nümayiş etdirilmişdir.

«ON1000» proqramı çərçivəsində ADPU Cəlilabad filialı Tələbə Gənclər Təşkilatının Şən və hazırcavablar klubunun təşkilatçılığı ilə “Gülüş dəqiqələri” adlı tədbir təşkil olunub. “Tədbirlərin təşkili və tələbələrlə iş” şöbəsinin müdiri Səbinə İsmayılova, mütəxəssis Nadir Babayev, Filialın Pedaqoji fakültə dekanlığının nümayəndəsi Elnarə İsmayılova və Filialın digər əməkdaşları, həmçinin, müxtəlif ixtisaslar üzrə tələbələr tədbirdə iştirak etmişlər.
İstedadlı tələbələrin xüsusi bacarıqları ilə müşahidə olunan tədbir bol gülüşlü anlarla yadda qalıb. Səhnəciklər nümayiş etdirilərək iştirakçılara duyğulu anlar yaşadılıb.

20 dekabr 2022-ci il tarixində Cəlilabad şəhər Heydər Əliyev Mərkəzində 44 Günlük Vətən Müharibəsində qəhrəmanlıq səlnaməsi yaradan Azərbaycanımızın igid övladlarından Şəhid Bayram, qazi Vüqar və Nurlan Babaşov qardaşlarının II Qarabağ savaşında keçirdikləri döyüş yollarından bəhs olunan tamaşa nümayiş etdirilmişdir. Müəllif və quruluşcu rejisor Buludxan Buludovun böyük əməyi nəticəsində hazırlanan tamaşa iştirakçıların xüsusi razılığı ilə qarşılanmışdır.
İlk olaraq ümumi Şəhidlərimizin əziz xatirələrinin anıldığı Rayon İcra Hakimiyyəti əməkdaşlarının, bir sıra səlahiyyətli qonaqların, Şəhid ailələrinin, qazilərin, müharibə iştirakçılarının, idarə və təşkilat rəhbərlərinin qatıldıqları tədbirdə Filialımızın professor-müəllim heyəti və müxtəlif ixtisaslar üzrə tələbələri iştirak etmişlər.
Vətənpərvərlik motivlərinin çox güclü nümayiş olunduğu tamaşa iştirakçıların alqışları ilə qarşılanmışdır.

14.12.2022-ci il tarixində ADP-nun Cəlilabad filialında Pedaqoji fakültə üzrə Fakültə Elmi Şurasının iclası olmuşdur. İclasın sədri, ADPU-nun Cəlilabad filialında Pedaqoji fakültənin dekanı, baş müəllim Mənzilə Rəhimova gündəlikdə duran məsələləri Şura üzvlərinin nəzərinə çatdırıb. Filialın tədris məsələlərinin bir çox sahələrinə toxunan dekan M.Rəhimova qarşıdan gələn Qış imtahan sessiyasına hazırlıqla bağlı önümüzdə duran vəzifələrdən danışıb. Filialda fəaliyyət göstərən kafedra əməkdaşlarına imtahan proseslərinə hazırlıq işlərinin aparılması ilə bağlı göstərişlərini ünvanlayıb. 2022/2023-cü tədris ilinin Payız semestri üzrə görülən işlər, əldə olunan uğurlar, həmçinin müəyyən aidiyyatı sahələrin daha da inkişaf etdirilməsinin zəruriliyi barədə müvafiq kafedra müdirlərinə tövsiyələrini verib.
2022/2023-cü tədris ilinin I yarısı üzrə tədrisin vəziyyəti və imtahan sessiyasına hazırlıqla bağlı “Dil-ədəbiyyat, pedaqoji elmlər və onların tədrisi texnologiyası” kafedrasının müdiri, dosent Yadulla Dadaşlı geniş hesabat təqdim edərək, bu istiqamətdə fikirlərini əsaslandırıb, aparılmış məqsədyönlü işlər barəsində əhatəli nitq söyləyib.
“Təbiət və Sosial elmlər, onların tədrisi texnologiyası” kafedrasının müdiri, baş müəllim Eldar Muradlı görülmüş işlər barədə eyni adlı hesabat təqdim edib və imtahan hazırlıq işlərinin sona çatmaqda olduğunu bildirərək Fakültə Elmi Şurasının işinə müvəffəqiyyətlər arzulayıb.
Sonra “Keyfiyyətin təminatı” şöbəsinin müdiri Dürdanə Əliyeva 2022/2023-cü tədris ilinin I semestri boyunca keçirilən akkreditasiya prosesinə toxunaraq işlərin uğurla davam etdirildiyini vurğulayıb. O, qeyd edib ki, professor-müəllim heyətinin elmi araşdırmaları ilə sıx surətdə bağlı olan reytinq qiymətləndirilməsi tədris prosesinin keyfiyyətinin artırılması üçün vacib məsələlərdən biridir və bu tendensiya mütəmadi olaraq davam etdiriləcəkdir.
Sonda cari işlərlə bağlı müxtəlif istiqamətlərdə bir sıra məsələlər müzakirə olunub. Elmi Şura üzvlərinin çoxsaylı sualları sədr M.Rəhimova tərəfindən ətraflı cavablandırılıb. O, Qış İmtahan Sessiyasının təşkili, keçirilməsi qaydalarına toxunaraq bu barədə müvafiq olaraq komissiya, qərargah, koordinatorlar qrupunun yaradılması haqqında məlumat verib. Xatırladırıq ki, Fənn komissiyalarının tərkibinin seçilməsi də Fakültə Elmi Şurasıın müzakirələri arasında yer almışdır.

Əsrlər boyu dünya tarixinə bəxş etdiyi mütəfəkkir şəxsiyyətlərin ümumbəşəri xidmətlərilə seçilən Azərbaycan xalqı XX əsrdə, hələ minnilliklər boyu fenomen dühası heyranlıqla öyrəniləcək yeni bir dahisini, insanlığın Heydər Əliyev zirvəsini bəşəriyyətin işıqlı sabahına bəxş etdi. Milliyətindən, cinsindən, irqindən, həyata baxış müstəvisindən asılı olmayaraq insanların həyatı, taleyi, fəaliyyəti, maraqları, məqsəd və məramlarına multikultural baxış fəlsəfəsindən yanaşan Ulu Öndər insanlıq tarixinə öz adını qızıl hərflərlə yazdırmışdır. Mənsub olduğu xalqın, Azərbaycanımızın şan və şöhrətinin artırılmasındakı fədakar əməkləri isə onun xalqımızın qəlbində daimi olaraq Böyük Lider zirvəsini yaratdı.
Dahi şəxsiyyətin misilsiz fəaliyyətləri, ensklopedik biliklərilə hələ zamanında dünyanın gəlib getmiş ən görkəmli ictimai siyasi xadimləri, müdrik insanları ilə müqayisə edilməsinə əsas vermişdir. Çünki, həyati fəaliyyətində zamanı qabaqlayan addımlarının atması, ilk öncə əsl vətəndaş qəhrəmanlıqları, tarix yaratma bacarığı daim heyranlıqla qarşılanaraq özünəməxsus qeyri-adi istedadı kimi qiymətləndirilmişdir. Təsadüfü deyildir ki, Dahi Liderin ümumən həyatının hər anı zaman-zaman xatırlanacaq hadisələrlə zəngin unudulmaz bir tarixdir.
Onun xalqımız içərisində əbədiləşən ümumxalq məhəbbətini qazanması şəxsi, ailə və cəmiyyət həyatında seçdiyi düzgün istiqamət, ümumhəyat mövqeyində qətiyyətli addımları, insani dəyərlərə səmimi və saf münasibəti idi.
Məlumunuz olduğu kimi Heydər Əliyevin şəxsi həyatı, uşaqlıq və gənclik illəri, ömrünün demək olar ki, bütün dövrləri gərgin zəhmətlə, əzmkar mübarizələr şəraitində keçmişdir. Ona zamanının çətin anları sonrakı mərhələlərdə müxtəlif maneələri dəf etmə bacarıqları verərək əsl Rəhbər mövqeyi qazandırmış, ardıcıl uğurların qazanılmasında, qeyri-adi istedadlarının nümayiş etdirilməsində, çoxlarına icrası mümkünsüz görünən işlərin peşəkarcasına həllində, qəhrəmanlara xas olan bir həyati zirvə fəth edilməsində yeni-yeni töhfələr vermişdir.
Bu böyük Şəxsiyyətin xalqımıza, vətənimizə sonsuz sədaqəti, məhəbbəti, uzaqgörənliyi, xeyirxahlığı, düşünülmüş və gərgin fəaliyyəti Azərbaycanımızın ictimai, siyasi, iqtisadi, mədəni, mənəvi həyatında yeni bir səhifə açmış, çoxsaylı nailiyyətlərinin əldə olunmasında misilsiz xidmətlər göstərmişdir. Parlaq zəka, dərin düşüncə, müdrik qərarlar isə unudulmaz Liderin həyat və fəaliyyəti haqqında hələ çox yazılacaq, danışılacaq bu şərəfli həyatın tarixi məqamlarını dönə-dönə insanlara çatdıracaqdır. Əlbəttə, bütün bu dəyərləri gələcək nəsillərə çatdırmaq bizlərin ziyalılıq borcumuz, gələcək nəsillərimiz üçün isə əsl vətəndaşlıq nümunəsidir.

Heydər Əliyev müdrik zəkası vətənini və xalqını sonsuz, böyük məhəbbətlə sevən, andına, sədaqətlə sadiq olan, qətiyyəti, inamı, müdrikliyi ilə milyonların sevgisini qazanaraq öz ətrafında birləşdirməyi bacaran, hadisələri məntiqlə qiymətləndirib reallıqlardan düzgün nəticə çıxaran vətənpərvər bir insanın sahib olduğu bir gerçəklik idi. Məhz, bu müdrik zəka Azərbaycanı daimi inkişaf edən müstəqil, azad, demokratik bir ölkə olaraq beynəlxalq aləmdə layiqincə tanıtdı, Bununla da dövlətçilik maraqlarını uğurla həyata keçirdiyi illərin unudulmaz səhifələrini yaratdı. Müstəqilliyimizin ilk illərində ölkəmizi parçalanmaqdan, çeşidli dövlət çevrilişlərindən, müxtəlif özbaşınalıqlardan xilas edərək xalqımıza yeni, firavan, getdikcə güclənən, daha da gözəlləşən bir həyat; müstəqil Azərbaycanı bəxş etdi.
Ulu Öndərin xalqımızın qarşısında ən böyük xidmətlərindən biri də onun ölkəmizin gələcəyini həssaslıqla düşünərək varisliyin prinsiplərini, mahiyyətini və əhəmiyyətini çox düzgün qiymətləndirməsi, zamanında düzgün əsaslandırması olmuşdur. “Mən ona özüm qədər inanıram və gələcəyinə böyük ümidlər bəsləyirəm” söyləyərkən ilk olaraq xalqımızın, ölkəmizin gələcək taleyini düşünmüş, dövlətçiliyimiz üçün parlaq gələcəyin inşasını çox etibar etdiyi layiqli davamçısı, Möhtərəm Prezidentimiz Cənab İlham Əliyevin daha da inkişaf etdirəcəyinə əminliyini nümayiş etdirmişdir. Elə bu uzaqgörən siyasət özünü doğrultmuş, Azərbaycanın sosial-iqtisadi, mədəni inkişafında, beynəlxalq aləmdə qazanılan uğurlarda və ən əsası torpaqlarımızın işğaldan azad olunmasında Dövlət-Xalq-Ordu birliyimizin heyrətamiz tamlığı, müdrikliyin bir daha əyani ifadəsinə çevrilmişdir.
Yüksək insani dəyərləri; düzgünlüyü, xeyirxahlığı, alicənablığı, dostluğu, kamilliyi, mərdliyi, saflığı və başqa ümumiinsanlıq üçün əsas olan dəyərləri vacib sayan dahi Şəxsiyyət eyni zamanda bəşəriyyətin savadlı gələcəyi üçün təhsilə önəm verirdi. Ümüdvarıq ki, qəlbimizdə böyük kədər dolu anı yaşadan 12 dekabr hüzn günü bizi heç bir zaman Ümummilli Liderimizdən ayıra bilməyəcəkdir. Fəxarətlə qeyd edirik ki, dünya insanlıq tarixinə adını qızıl hərflərlə yazdıran Heydər Əliyev zirvəsi zaman keçdikcə daim öz əsaslı, heyrətamiz mövqeyini qoruyacaq, ürəkləri Azərbaycanla döyünən bütöv xalqımız üçün qürur mənbəyi olacaqdır.

Nadir Babayev, Tərəqqi medallı
Azərbaycan Dövlət Pedaqoji Universitetinin Cəlilabad filialı
“Tədbirlərin təşkili və tələbələrlə iş” şöbəsisin mütəxəssisi