11 noyabr 2022-ci il tarixində ADPU-nun Cəlilabad filialında Təbiət və Sosial elmlər, onların tədrisi texnologiyası kafedrasının baş müəllimi Ələsgər Mirzəzadənin təqdimatında elmi seminar keçirilmişdir. Seminarda Filialın direktoru, dosent Xudayar Sultanlı, Pedaqoji fakültənin dekanı, baş müəllim Mənzilə Rəhimova, Azərbaycan Milli Elmlər Akademiyasının Arxeologiya, Etnoqrafiya və Antropologiya İnstitutunun arxeoloqları professor Tufan Məmmədov, tarix üzrə fəlsəfə doktoru Vəfa Mahmudova, Cəlilabad rayonu Şatırlı kənd orta məktəbin tarix müəllimi, tədqiqatçı Elşad Əmənov, Filialın Təbiət və Sosial elmlər, onların tədrisi texnologiyası kafedrasının professor-müəllim heyəti, Tədbirlərin təşkili və tələbələrlə iş şöbəsinin əməkdaşları, “Tarix və coğrafiya müəllimliyi” ixtisasının tələbələri iştirak etmişlər.
Giriş sözü ilə bütün seminar iştirakçılarını salamlayan Filialın direktoru, dosent Xudayar Sultanlı AMEA-nın nümayəndələrinin Filialımızda görməkdən məmnun olduğunu, həmçinin onların ölkəmizin ən qədim tarixi yaşayış yerlərindən olan Cəlilabad rayonunda apardıqları müxtəlif tarixi-tədqiqat işlərini yaxından izlədiyini və bu araşdırmaların çox sevindirici olduğunu bildirib. Ulu Öndərimiz Heydər Əliyevin layiqli davamçısı, Respublika Prezidentimiz Cənab İlham Əliyevin dövlətçiliyimizin bütün istiqamətlərində olduğu kimi, maddi-mədəni sərvətlərimizin qorunması istiqamətinə də həssas yanaşmasını yüksək qiymətləndirdiyini seminar iştirakçılarının diqqətinə çatdırıb.
Sonra professor Tufan Məmmədov və Vəfa Mahmudova söz alaraq hal-hazırda Cəlilabad rayonunda apardıqları arxeoloji tədqiqat işləri haqqında seminar iştirakçılarına ümumi və maraqlı məlumatlar veriblər.
Baş müəllim, tarix üzrə tədqiqatçı Ələsgər Mirzəzadə Elmi seminarda geniş təqdimatla çıxış edib. O, xüsusən Cəlilabad rayonunun Üçtəpə ərazisində aparılan arxeoloji abidələrə aid maddi-mədəni nümunələr, onların tarixi, əhəmiyyəti barədə seminar iştirakçılarını məlumatlandırıb. Tələbələrin maraqlı və çoxsaylı suallarını ensklopedik çalarlarla cavablandıran Ə.Mirzəzadə həmin ərazilərdə hələ də bu istiqamətdə arxeoloji qazıntıların davam etdiyini və aşkar olunacaq hər yeni maddi mədəniyyət nümunəsinin Azərbaycan tarixinə zənginlik qatacağına ümüdvar olduğunu bildirib.
